Friday, October 31, 2008

ഒബാമയും ഒസാമയും പിന്നെ ഞാനും!

ആദ്യമായി ഒബാമ ഒബാമ എന്ന് കേട്ടപ്പോള്‍ "ങേ ഒസാമയോ??? ഇങ്ങോര്‍ക്കെന്താ ഈ അമേരിക്കയില്‍ കാര്യം?" എന്നാണ് ഞാന്‍ ഓര്‍ത്തത്‌. പിന്നെയാണ് മനസ്സിലായത് ഇതു ഒസാമയല്ല വേറെ ഒരാമയാണെന്ന്. എന്തായാലും സംഗതി കൊള്ളാം. സര്‍വ വിധ സംസ്കാരങ്ങളും ഐക്യത്തോടെ കഴിയുന്ന അമേരിക്കന്‍ ഐക്യ നാടുകളെ അവസാനം ഒരു താണ ജാതിക്കാരന്‍ ഭരിക്കാന്‍ പോവുന്നു. കേള്‍ക്കുമ്പോള്‍ ഒരു സുഖം ഒക്കെയുണ്ട്.

പക്ഷെ ഈയിടെയായി ഇപ്പോള്‍ എവിടെ നോക്കിയാലും ചര്‍ച്ചാവിഷയം ഒബാമയും മാക്‌ കെയിനും തന്നെ. നമ്മടെ രാജ് താക്കറെയും ലാലു പ്രസാദ് യാദവിനെയും ഒന്നും ആര്‍ക്കും വേണ്ട. രാജ് താക്കറെ ആണെങ്കില്‍ അങ്ങ് മുംബെയില്‍ വടക്കെ ഇന്ത്യക്കാരെ ഒക്കെ അടിച്ചോടിക്കുന്നു, ബസ്സുകളും ട്രെയിനും കത്തിക്കുന്നു, എന്തിനധികം ജയിലില്‍ വരെ കിടന്നു. എന്നിട്ടും ഈ ഒബാമക്ക് കിട്ടുന്ന ശ്രദ്ധ പുള്ളിക്ക് കിട്ടുന്നില്ല. കഷ്ടം തന്നെ!

വാര്‍ത്താ മാധ്യമങ്ങളെ കുറ്റം പറയാന്‍ പറ്റില്ല കേട്ടോ. അത്രയ്ക്ക് ഉശിരന്‍ വാര്‍ത്തകളല്ലേ കിട്ടുന്നെ. സാറാമ്മയുടെ ഏറ്റവും ഇളയ മകള്‍ ശരിക്കും മകളാണോ അതോ കൊച്ചുമകളാണോ? ജോ എന്ന ഏതോ ഒരാള്‍ക്ക് ഒബാമയെ ഇഷ്ടപെട്ടോ? അങ്ങനെ പലതും. പക്ഷെ ഇന്നാളു കോയമ്പത്തൂരിലെ ഒരണ്ണന്‍ ഒബാമക്ക് വേണ്ടി ശത്രുസംഹാര പൂജ നടത്തുന്നു എന്ന വിവരം അറിഞ്ഞപ്പോള്‍ ഞാന്‍ ഞെട്ടി. വന്ന് വന്ന് അമേരിക്കയോട് പരമ പുച്ചമായ മലയാളി വരെ ഇപ്പോള്‍ ഈ തിരഞ്ഞെടുപ്പിനെ കുറിച്ചേ സംസാരിക്കുന്നുള്ളൂ! കലികാലം അല്ലാതെന്തു പറയാന്‍!

എന്‍റെ സംശയം അതല്ല. ഈ ഒബാമയും ഒസാമയും തമ്മിലെന്താണാവോ ബന്ധം? എന്ന് മാത്രല്ല ഒബാമ - ബിദന്‍ എന്ന് പറയുന്നത് ഒസാമ - ബിന്‍ - ലാദന്‍ എന്നതിന്‍റെ ഒരു കോഡ് പോലെ. ഇതിലെന്തോ കളിയില്ലേ? അതിനിടക്ക് ഒബാമയുടെ മുഴുവന്‍ പേരു ബാരക്ക് ഹുസ്സയിന്‍ ഒബാമ എന്നാണത്രേ? സദ്ദാം ഹുസ്സയിനും ഒരു ഹുസ്സയിന്‍ ആയിരുന്നില്ലേ. ബുഷിന്‌ പറ്റിയ എതിരാളി തന്നെ ഈ ഒബാമ. "ധ്രുവം" സിനിമയില്‍ പറഞ്ഞ പോലെ "ഹുസ്സയിന്‍ ഒബാമ - ഹാല്‍ഫ്‌ ഹുസ്സയിന്‍ ഹാല്‍ഫ്‌ ഒസാമ!" ഈ അമേരിക്കക്കാര്‍ ഇത്രയൊക്കെ കേട്ടിട്ടും ഒബാമയെ പിന്തുണക്കുന്നത് അദ്ബുദം തന്നെ.

ഒബാമ ജയിച്ചാല്‍ സാറാമ്മ തോല്കില്ലേ എന്നായിരുന്നു എന്‍റെ വേറൊരു സംശയം. 2012 തിരഞ്ഞെടുപ്പില്‍ സാറാമ്മക്ക് ഒരു കൈ കൂടെ നോക്കാമല്ലോ എന്നാരോ പറഞ്ഞപ്പോഴാണ് ഒരു സമാധാനം. സാറാമ്മയും ഒസാമയും കൂടാവുമ്പോള്‍ സംഭവം കൊഴുക്കും. ഹിലാരിയെക്കാളും എനിക്കിഷ്ടമായത് സാറാമ്മയെയാണ് :)

ഒബാമ വിജയിച്ചാല്‍ ചരിത്രം സൃഷ്ടിക്കും എന്നത് ഉറപ്പാണ്. ലോകസമ്പദ് വ്യവസ്ഥയെയും, അമേരിക്ക, ഇറാഖ്, അഫ്ഘാനിസ്ഥാന്‍, വടക്കന്‍ കൊറിയ, ഇറാന്‍ തുടങ്ങിയ ചില തെമ്മാടി രാഷ്ട്രങ്ങളെയും രക്ഷിക്കാന്‍ പറ്റിയില്ലെങ്കിലും, തൊലി കറുത്ത ആദ്യത്തെ അമേരിക്കന്‍ പ്രസിഡന്റ് എന്ന നിലക്കെങ്കിലും. നമ്മടെ കെ ആര്‍ നാരായണന്‍ ഇന്ത്യന്‍ പ്രസിഡന്റ് ആയതാണ് ഇതിന് മുന്‍പേ ഞാന്‍ അറിയുന്ന ഒരു ചരിത്ര സംഭവം. അത് എത്ര പേര്‍ക്ക് ഓര്‍മ്മയുണ്ടോ ആവോ?

Monday, October 13, 2008

ബന്ധമില്ലാത്ത ചില കാര്യങ്ങള്‍...

1. ഇപ്രാവശ്യം വീട്ടില്‍ എത്തിയപ്പോള്‍ ഞാന്‍ അന്ധാളിച്ചു. ചേട്ടനും ചേട്ടത്തിയമ്മയും ഒരു ബാറ്റ് വീശി കളിക്കുന്നു. സംഗതി ഇലക്ട്രോണിക് ആണ്. ഒരു ബട്ടണ്‍ ഞെക്കി പിടിച്ചു വീശിയാല്‍ കൊതുക് കുടുങ്ങിയത് തന്നെ. കുറഞ്ഞ ചെലവ്, കുറഞ്ഞ പ്രയത്നം, കൂടുതല്‍ കൊതുകള്‍ക്ക് മരണം! ആദ്യമൊന്നും എനിക്കതിനെ അത്രക്കങ്ങു ഇഷ്ടമായില്ല. കൊതുകിനെ അടിച്ചു കൊല്ലുന്നതിന്‍റെ രസം ഇതിനില്ല. അപ്പോഴാണ്‌ ചേട്ടന്‍റെ ഉപദേശം. "ഇവിടെയൊക്കെ ഇപ്പോള്‍ ചിക്കന്‍ ഗുനിയ ആണ്. കൊതുകിനെ കൈ കൊണ്ടു കൊല്ലുന്നതും അത്ര സുരക്ഷിതം അല്ല. കൊല്ലാതിരുന്നാലും പ്രശ്നമാണ്. അതല്ലേ ഞാന്‍ ഇതു വാങ്ങിയത്!" സംഗതി ശരിയാണെന്ന് എനിക്കും തോന്നി. ഉപയോഗിച്ചു നോക്കിയപ്പോള്‍ നല്ല സുഖം ... നമ്മുടെ ചോര കുടിക്കുന്ന കൊതുകുകള്‍ ഇങ്ങനെ കരിഞ്ഞു തീരുന്നത് ഒരു കാഴ്ച തന്നെയാണ്!

... തിരിച്ചു പോരുന്നതിന്‍റെ തലേ ദിവസം, ഒരു മേശയുടെ മുകളില്‍ കയറി, മച്ചിലുള്ള കൊതുകിനെ കറന്റ് അടിപ്പിച്ചു കൊല്ലാന്‍ ശ്രമിക്കുന്ന എന്നെ കണ്ടപ്പോള്‍ ചേട്ടത്തിയമ്മയുടെ കമ്മന്റ്: "ഇവിടെ എല്ലാരും താളവട്ടത്തിലെ മോഹന്‍ ലാലിനെ പോലെ ആയെന്നു തോന്നുന്നു!"

2. വീട്ടിലേക്ക് പോവുന്ന വഴിക്ക് കണ്ട ചില കാഴ്ച്ചകള്‍:

പാടത്തിന്‍റെ നടുവിലുള്ള ഈ വീട് വയനാട്ടിലാണ്. മുത്തങ്ങ കഴിഞ്ഞ്, ബത്തേരി എത്തുന്നതിനു മുന്നേ.

ഇതു ലക്കിടി. ചുരം തുടങ്ങുന്നതിനു തൊട്ടു മുന്നേ. സമയം നട്ടുച്ച ആണെങ്കിലും മഞ്ഞു മൂടി കിടക്കുന്ന മലനിരകള്‍, അതിനിടക്ക് ചെറിയ മഴച്ചാറലും, നേരെ മുന്നില്‍ നിര്‍ത്തിയിട്ടിരുന്ന ഒരു സ്കോര്‍പിയോ, വേര്‍സയുടെ ചില്ലിനകത്തൂടെ.

3. ഹംപി യാത്ര ഉഗ്രനായിരുന്നു. കൂടുതല്‍ കവിതയൊന്നും വന്നില്ലെങ്കിലും (ആ കവിത വായിക്കാത്തവര്‍ ഈ വഴി ഒന്നു പോയി വരൂ), ഹംപി കഴിഞ്ഞ് പോയ സ്ഥലങ്ങള്‍ കുറെ കൂടെ നന്നായി. കുറഞ്ഞത് നമ്മളെല്ലാം തിന്നുന്ന ഉള്ളി വരുന്നതു ബാഗല്‍ക്കോട്ടു നിന്നാണെന്നു മനസ്സിലായി. പിന്നെ ചോളം വിരിയിക്കുന്ന പാടങ്ങളും, സൂര്യകാന്തിപ്പൂക്കളും ... എല്ലാം കൊണ്ടും മനോഹരമായ ഒരനുഭവം. പൂര്‍ണമായ യാത്രാവിവരണം ഇവിടെ ഉണ്ട്.

Thursday, October 02, 2008

ഒരു ഹംപിക്കവിത

ഇന്നലെ ചിത്രദുര്‍ഗ്ഗ - ഹംപി റോഡില്‍ വന്നു കൊണ്ടിരിക്കുമ്പോള്‍ ആണ് ഈ ബോധോദയം ഉണ്ടായത് - ഈ ഹംപിക്ക് ഹംപി എന്ന് പേരു വരാന്‍ കാരണം ഈ ഹമ്പുകള്‍ തന്നെ. എത്രയെണ്ണമാണ് ... പല സൈസില്‍ ... കുറേയെണ്ണത്തിനു ബോര്‍ഡും, വെള്ള വരയും ഒന്നുമില്ല ... അത് കൊണ്ടു നടുവ് ഒടിഞ്ഞു, വണ്ടിയുടെ സ്ഥിതി എന്താവുമെന്ന് കണ്ടറിയണം.

ഇന്നിപ്പോ ഹോസ്പേട്ട് - ഹംപി റോഡില്‍ കൂടെ വരുമ്പോള്‍ ബോധോദയം പൂര്‍ണമായി. അപ്പോള്‍ തോന്നിയതാണ് ഈ രണ്ടു വരികള്‍ (ഇതു പാടേണ്ടത്, മീശ മാധവനിലെ, "മീശക്കാരന്‍ മാധവന് ദോശ തിന്നാന്‍ ആശ ...." എന്ന് തുടങ്ങുന്ന പാട്ടിന്‍റെ താളത്തിലാണ്):
ഹംപിയിലെ ഹമ്പുകള്‍ക്ക് വമ്പു വന്നല്ലമ്പോ ... അമ്പോ ... അമ്പോ ...
ഹമ്പ് ചാടി അമ്പുവിന്‍റെ വമ്പു പോയല്ലമ്പോ ... അമ്പോ ... അമ്പോ ....

ഇതു വായിച്ച് എന്നെ തല്ലാന്‍ തോന്നുവര്‍ക്ക് അതിന് പകരം ഹംപിയിലെ ഹമ്പുകളെ പഴിക്കാം ... ;-)